星廚 (已結業)

如果说九龙太子一带的饮食地图，分为酒吧街、连锁店与个性小店3个部分，今日帮衬嘅西餐厅，就绝对属于后者。太子近荔枝角道，有多间个性小店，呢间开业无耐，原店由长沙湾迁址至此，老板推介咗佢地两大精选招牌菜:慢煑牛肋骨和烤焗咸猪手，我谂一谂10月德国啤酒节就话食猪手饮啤酒啫，估唔到呢度都有！？老板笑笑口答:酒牌仲申请紧，所以啤酒暂欠奉，不过猪手就可以即刻整比客人，咁有诚意，点都要试！等咗10分钟。烤焗咸猪手配酸椰菜上枱，哗！用木版盛载嘅猪手有我块面咁大！金黄脆皮香气朴鼻，加埋3种酱汁、酸菜、配菜，卖相同德国餐厅有得挥！紧系相机食先！好嘞！影完相切开睇过……好脆㖞块猪手皮，咬啖咬啖再食肉，又几鬼外脆内嫩，肉质起丝，有图有真相……3种酱汁由淡至浓试下……烧汁、黑醋汁、芥辣，个人认为都系芥辣最夹。有D人就钟意用烧汁淋面，或加在意粉上，计我话猪手咁大只，食得完已是壮举！食到咁上下……老板话呢度D意大利奶冻都唔错架，咁就要点一客啦！哈！心型奶冻由浓厚忌廉打成，不似外面只系用奶同鱼胶粉，口感又的确好滑，加上拌碟士多啤梨酱，好味！