鴛鴦口味 (已結業)

收工过湾仔买模型，顺路拣左呢间，8点零钟都多人，等执枱等左两分钟。冇乜心水食乜就决定试D新口味 - 黑松露菌炒蛋菠萝包，本身真系未食过黑松露菌。外观就唔错架，但系由于从来未食过黑松露，确实系有D十五十六，第一个反应系好大"pat"黑松露酱，真系好多，菠萝包胀卜卜，都keep到脆皮，我唔知其实黑松露价钱有几贵，不过份量多成咁收呢个价钱都真系叫合理冇怨言。人生第一次食，黑松露又系咩味呢?我先系连埋个包同炒蛋一齐食，好新奇又唔识点简单形容，即系你食三文治通常都系食啲料，但呢个包就相反，好似食一个蛋治但搽左好多好多唔同嘅酱咁，涩涩地、又清清地、又有草地味、又有少少少少咸，好难形容，我唔知一般黑松露系点食，但除左夹炒蛋我真系谂唔到应该仲可以配咩，反而菠萝包系其次，但都OK，好唔好食真系见仁见智，但肯定呢个包真系一试难忘。饮品建议配热/暖茶，因为真系好重味，配水是不行的。未见过其他地方有得咁样食，通常只会喺高级地方先会有，鸳鸯呢度叫做平民D，所以系几值得一试。