LA Restaurant & Dessert Bar (已結業)

通菜街一向都多野食，是日约左朋友去旺角行街，佢介绍黎呢间西餐。餐牌上面有好多选择，可以拣套餐或者a la carte。餐汤配餐包：是日餐汤系南瓜汤，入口好creamy，无粉粒，味道亦都非常浓郁。餐包方面系法包，上面涂咗蒜蓉酱，新鲜烤起，非常香脆，旁边仲配咗自家制嘅蕃茄酱，入面仲有好多蕃茄粒，食落好有口感，非常特别。烤焗芝士蟹肉牛油果:牛油果熟嘅程度刚刚好，入口极之Creamy，上面放左少少蟹肉，再铺咗少少芝士去烤，味道十足，带轻轻嘅芝士味，配埋底部嘅新鲜沙律菜，整体配搭非常清新。德国咸猪手配酸椰菜:上菜时真系令我地「哇」一声，只猪手真系好大只呀！入口热辣辣，外皮烧得超香脆，肉嫩而香滑得黎又唔太油腻，颜色呈嫩红，食落好够咸香味，唔洗点酱汁已经好好食，伴碟仲有沙律菜，酸菜同埋蔬菜， 入口非常清新，令整体油腻感减低。LA 伯爵茶奶冻焦糖脆脆伴雪糕:个奶冻有好香浓嘅伯爵茶味，配上香甜嘅云呢拿雪糕，加埋香脆嘅焦糖脆片，劲有口感，亦都令到层次非常丰富。饮品我地要左热利宾纳同埋咖啡，咖啡味劲香浓，为我地嘅晚餐划上完美句号。