鯛魚魚湯專門店 (已結業)

自己经常都会煲汤，唯独是对鱼汤就投晒降，一来煲唔到奶白色，二来煲完会腥，亦怕煲汤时有好多骨，所以对坊间的鱼汤米线情有独钟。居于太古城友人告之鲗鱼涌有鲷鱼汤专门店，果头星期六日唔系好多舖头有开，既然咁讲，就趁周末揾友人聚旧兼食饭。友人告之食晚餐要趁早，因为夜咗人多兼且部份限量菜式会售罄，我同友人六点半到达坐到最后一张枱，迟嚟真系要等位。友人系熟客，由佢发板。佢帮我叫咗鲍鱼花胶鱼肚鱼汤乌冬，听落真系好名贵，又鲍鱼又花胶又鱼肚。鲍鱼有两只，食落唔讲得少，真系有鲍鱼味，烟韧弹牙。花胶似系花胶筒，有三至四旧，胶质唔系好重，不过话晒都系花胶，食咗感觉皮肤都会滑啲。鱼肚都有三至四旧，似砂爆鱼肚，质地软腍，吸汤能力高。奶白鱼汤用鲷鱼淆制，感觉上冇落味精，味道比较清甜鲜美，冇咁浓郁。手打乌冬也不错，质感烟烟韧韧。呢个价钱食到鲍鱼花胶鱼肚好似好抵，性比价高。友人的皇帝蟹脚海胆汤饭，根据佢形容，蟹脚开半容易起肉，肉质鲜甜，海胆新鲜无腥，入口即溶，混入鱼汤中有提鲜作用。另外亦叫了小食饺子鸡翼，鸡翼已起骨，酿入猪肉，鸡翼皮香肉滑。