Ginza West (已結業)

这一家创办自1947年嘅日本洋菓子老店「银座‧西点」（Ginza West）晌网上有唔少食评，所以，佢嘅背景、历史就唔多讲。友人真喺好细心，怕未知几时先又再见到面，就预早醒小弟一份生日礼物，就喺银座‧西点嘅酥饼礼盒，曲奇、酥饼类嘅产品，啱晒我啦。包装非常高雅，珍珠白嘅包装纸，配以金线，尽显贵气。打开包装，内有6片店中名物「树叶饼」及8条「芝士酥条」，全独立包装，方便衞生，但友人话晌日本全人手制作，兼且无添加，空运到港，所以食用期短。盒内仲附有一份单张，介绍店中所有产品，包括曲奇、酥饼、树叶饼、维多利亚饼、芝士酥条及牛油酥条，并有多款礼盒。树叶饼如一贯酥饼类产品，主要以西式酥皮嚟做，口感犹如常食到嘅蝴蝶酥之类，不过，做成树叶形，此外，从单张所见亦有细块啲嘅「小树叶饼」。咬落确然非常酥脆，又富有牛油香，饼面洒满沙糖，却又唔会太甜。芝士酥条同样以酥皮为制作基础，注入芝士元素，入口一样酥脆至极，但咸香浓郁嘅芝士味就更突出其个性。比起树叶饼，老婆超钟意依个。小就两款饼食都钟意，简直有「酥」认老豆啦，哈哈！再次多谢老友份心意，让小弟一尝这半世纪有多日本老店嘅招牌出品。