國金軒

营业中

休息中

第二次喺呢间国金轩食晚饭，上次系两年前同妈妈庆生，当时觉得食物质素好，所以今次再嚟。可能因为最近环境问题，令食肆晚饭生意少咗，见我哋有11位就安排入房坐，以我所知平时订厅房有最低消费，所以今次星期六嚟无最低消费有房坐都几好彩。本来想食和牛，但侍应就推介无花果罗勒牛肉，做法其他地方较少食到，几特别。鱼就食咗原条东星斑两食—XO酱芦笋炒斑球同陈村粉蒸头腩，味道唔错。爵士汤做得唔及西苑好，无咩特别。屋企人觉得个松露野菌炆伊面最好味，我就觉得啫啫唐生菜够香够惹味。因为知道我哋系为长老庆生，侍应好贴心送咗甜品，系万寿果炖雪耳，清甜滋润。整体食物质素相当唔错，而侍应服务亦算殷勤，只系上菜时间太长，由落单到埋单差不多两个半钟，可能高级食府系咁，只系我呢啲平民百姓唔习惯。