相撲手日式放題 (已結業)

今日同几位巴打饭聚一下，为左食得尽兴，佢地拣左位于宝勒巷既相扑手日式放题，等大家可以就自己口味任叫任食。2楼全层都系餐厅范围，装修以黑色为主，配以木制枱椅，配上微微既灯光，非常有格调。坐位都够晒阔落，无论情侣约会，朋友饭聚，都非常适合。刚坐低研究紧点菜纸之际，叮叮叮叮叮....原来有即㓥蓝鲸吞拿鱼表演，睇住师父手起刀落，不消十分钟就将大大条蓝鲸吞拿鱼切成一片片既刺身。每位客人可以品尝到两片肥美鲜甜既吞拿鱼刺身。设有饮品柜同甜品柜，有各式各样既饮品同甜品供客人拣选，食几多拎几多。芝士烟肉焗蚝，蚝够晒大只，肥嘟嘟咁非常饱满，一啖咬开蚝汁就出晒黎，鲜甜既蚝汁加配焗到微焦既芝士烟肉，咸咸地令蚝味更出色，我地几个巴打都好欣赏呢个焗蚝，每人食左4-5只，越食越好味！花之恋，三文鱼够肥美，蟹籽又够多，入口蟹籽卟卟爆开，又鲜又甜。柚子芥末帆立贝，好特别既配搭，柚子甘甘地配埋呛鼻既芥末，又唔会抢左帆立贝既鲜甜味道，出奇地配合，难怪成为no.1推介。火炙鳗鱼，鳗鱼肉质鲜嫩，经火炙烧过后味道更香，令鳗鱼味更突出。今次主要都系食寿司刺身，寿司整体都非常有水准，刺身又够新鲜，款式选择又多，绝对性价比高。