西樹泡芙 (旺角站)

营业中

休息中

每次返工行過旺角地鐵站，都會聞到好香嘅烘焙味，但每次都趕時間買唔到。今日襯假期經過，終於有機會買到西樹泡芙。 今次總共買咗三個泡芙, 其中一款係新年限定版，叫做黃金滿屋，好好意頭。其實佢係流心奶黃肉鬆味，平時都好少見有咁樣嘅配搭。除咗泡芙本身外脆內軟，內餡嘅奶黃忌廉，配上表面滿滿嘅肉鬆，鹹鹹甜甜，口感好得意。 另一款我揀咗濃朱古力味。食落去原來除咗泡芙上面嘅cream同中間嘅布甸係朱古力味之外，連泡芙本身都係朱古力味，味道香濃，好適合朱古力味愛好者。 最後一款係士多啤梨味泡芙。賣相非常吸引開胃。士多啤梨咬落口甜而不膩，加埋乳酪作為內餡，感覺好清新，最好就係用黎做飯後甜品。 一口氣食哂三件真係好飽肚，充滿滿足感。 最後要讚一下包袋，店員好細心咁係盒入面放埋乾冰，就算攞到返屋企先食，泡芙同入面嘅cream都保持到溫度唔會融化。