半島冰室

营业中

休息中

半岛冰室算系呢到嘅地区美食，好受欢迎，次次经过都有人排紧队。排队嘅途中可以顺便睇下墙上嘅餐牌有咩食，最好决定埋，因为佢呢度点单速度不逊色于澳牛。我坐底一秒就有位阿姐问我食咩，我叫佢俾时间我睇睇Menu，佢行开咗几秒又返嚟问食咩。所以一早决定好食咩好重要，但好彩我都喺𠮶几秒之间决定到食咩。我点咗下午茶餐嘅芝士煎蛋猪扒包，连埋杯冻柠茶系34蚊。落单速度快，上餐速度亦快，几分钟阿姐就放低咗碟蜘蛛包(芝猪包)，我觉得个简称都几搞笑哈哈。面包热辣辣，厚厚一块嘅猪扒上面系半溶嘅芝士同煎蛋。材料简单唔花巧但睇落已经好吸引，连坐我对面嘅友人都忍唔住问我可唔可以俾佢咬一啖个包。猪扒虽厚但唔韧亦唔干，夹埋溶咗嘅芝士同热辣辣嘅包真系觉得好食！唯一唔好嘅地方系个包太热，建议摊一摊先好食会好啲。个包入面煎蛋冇乜惊喜，蛋边唔够脆，蛋黄对我嚟讲有啲过熟，如果再流心啲更好。34蚊嘅价钱连嘢饮系香港嚟讲唔算贵，食物质素绝对对得起呢个价。期待下次去试埋佢其他菜式。