西貢越南真味

营业中

休息中

又嚟九龙城，呢区出名多好嘢食，今次嚟石狮子道嘅「西贡越南真味」，试吓佢嘅招牌「火车头河粉」同埋「越式牛坑腩河粉」。河粉果然出色，真心超滑，最正系即使食到尾浸耐咗，都唔会断开晒同淋晒。汤底浓厚好味，冇加味精，饮完唔觉会口渴。「火车头」又超级大碗，有爽弹牛丸、充满胶质又淋嘅牛筋，牛味浓嘅安格斯牛片、嫩滑生牛片、爽脆牛栢叶、鲜甜入味萝卜片，再配有满满洋葱、芽菜、炸蒜葱头，足料足味足份量；至于坑䐱就够晒淋香。要特别重点推介佢哋嘅「牛油鸡翼」，上台够晒热辣辣，大大只、香喷喷，外脆内滑。店员仲要好细心讲解制作过程相当讲究，先将鸡翼炸一次捞起，另外用牛油炸香大量蒜片，再将鸡翼放入炸蒜牛油中翻炸，让鸡翼沾上香蒜牛油，难怪咁好味啦。饮品方面，点了一杯「绿豆凉粉冰」，呢个就系常见经典饮品，至于「凉粉可乐」真系第一次见，即管又试吓佢，饮落可乐同凉粉又几来啵。