三星台菜食堂 (新城市廣場一期) (已結業)

下昼约咗友人去新城市行街，因为朋友晚上有事，于是我哋就决定早啲食晚餐。Check 咗啲食肆，睇到呢间三星，因为我哋两个人都好耐冇食台湾嘢喇，于是就决定食呢间。大概系时间仲早（大约傍晚6:30），去到嘅时候人唔多，可以马上入座，如冇记错，佢系限时食个半钟嘅。因为大家都唔算太饿，所以就决定每人嗌一碗面。我因为钟意食辣，就叫咗一碗麻辣三星面，至于我个朋友，佢就嗌咗一碗花雕鸡髀面。小食方面，我哋要咗一碟蒜泥白肉。麻辣三星面有牛腱、牛筋同牛肚。牛腱同牛筋煮得够腍，系我钟意嘅口感。个汤底够浓郁，亦都够麻辣，配上粗面，食落有满足感。我朋友𠮶碗花雕鸡髀面，我都试咗一啖汤底，非常重花雕味，唔错。至于碟蒜泥白肉，我个人就觉得非常之麻麻。比起其他餐厅嘅蒜泥白肉，佢啲蒜泥唔够多，肉亦都切得太厚，下次嚟会选择其他小食。其实餐牌上最吸引我嘅系佢嘅甜品。不过我哋实在冇个胃口食咁多，下次有机会揾多几个人去食佢嘅古早味黑糖刨冰，一定好过瘾😋！