潮福蒸氣石鍋 (已結業)

近來香港好興蒸氣火鍋，因為乜都要健康，蒸又的確健康啲！今晚帶左舅父仔一家去食蒸氣火鍋！先揀一個粥底，揀左瑤柱鮮准山粥，見住啲材料放晒係個鍋度，好多材料，煲好後即刻"不"左碗食，甜甜地，米多所以粥都"傑"，粒粒瑤柱都淋，粥內充滿瑤柱味。有一堆食物係任叫任食的，先試馬拉糕，甜甜地幾軟熟。再來雜菜籃，有菜芯，黃牙白，粟米等。粟米好甜，不過其實咁食菜唔係咁好，啲菜淋晒好似無晒營養咁。估唔到蟲草花清遠雞的蟲草花蒸左咁耐都幾爽口，雞件夠嫩滑，好在任食，我前後叫左3次！丸類新鮮，豬肉丸鮮蝦丸都係手打，幾彈牙的！海鮮每枱可以揀五款，肉蟹非常鮮味，雖然拆蟹鉗麻煩，但值得，因為蟹膏多，蟹肉又夠鮮味！花竹蝦有啲蒜蓉舖面，所以好香好惹味，花竹蝦都有成隻手掌咁大隻！美國石蠔蒸完之後就遜色左啲，un un地同埋好痴牙，食完要用牙簽徹底清理！Overall海鮮都唔錯，挺鮮味，淨食海鮮一定唔飽，好在有其他任叫，可以好好填飽肚。