十二味 (搵食市集)

营业中

休息中

平時都係食日本嘢同西餐多，好少特登去食中菜，今日男朋友突然心血來潮話好想食酸菜魚，於是我哋就去咗大圍一間叫做十二味嘅酸菜魚餐廳度食啦。十二味分店喺香港都好似好多間，去到邊度都見到，而大圍呢間都好就腳，就係喺火車站行一兩分鐘都到。呢間餐廳樓面都幾大，估唔到閑日嘅夜晚都咁墟冚，食嘢嘅時候講嘢真係幾乎要嗌出嚟對方先聽到🤣呢度叫嘢食可以用手機scan QR code，非常好，疫情期間最唔想就係掂到大家共用嘅Menu。因為兩個人食酸菜魚基本上都好夠飽，所以我哋就淨係帶咗一盤酸菜魚然後加咗兩個白飯，再加飲品。酸菜魚嚟啦！其實我唔係一個會食熟魚嘅人，但係酸菜魚係非常少有地我會食既魚！因為有酸辣嘅湯底已經完全可以遮蓋左我唔鍾意嗰浸熟魚味～而且呢度嘅魚感覺都新鮮，唔會有嗰種魚腥味。而且呢一個辣味嘅程度都啱啱好，唔會泰勒又唔會唔夠啦，超啱我呢種食唔到超麻辣但係又鍾意食少少辣嘅人。初頭其實都有少少驚會唔會唔夠飽，後來見到之後都覺得擔心係多餘嘅，因為魚嘅份量真係好多！呢啲湯底撈埋啲飯嚟食真係正～飲品方面，叫咗款解辣嘅飲品，有芒果梳打，非常配合。滿足的一餐。