拉麵凪 (已結業)

朋友介紹，今日咁啱經過銅鑼灣，去試吓。要排隊，正常的。當時我面前有兩對男女，合共四人，店員十分有禮貌，店員A亦都有介紹佢哋嘅餐牌，亦都俾咗點菜我。我寫完之後，繼續等，見到前面四個入晒，跟住再入多兩個，我唔出聲，再入多兩個。跟住我好聲好氣同店員B講：「我之前跟住最先嗰四個，你入咗六個嗰陣我都冇出聲，而家入咗八個啦，咁幾時到我呢？」店員B堅持人哋先過我，亦再有禮貌地回覆：「佢話同事店員A同佢講人哋前過我。」我心諗，當我之前睇錯都好，第七第八個我係睇住佢入嚟點菜，點會前過我？！我入嚟嗰陣門口又冇人！當中佢有冇同佢同事溝通，我真心唔知。咁我亦都好有禮貌同佢講：「我肯定我先過佢哋。」講完之後，俾返張點菜單佢走人。而家世代，做人有堅持係好嘅，你有你堅持，我都有我嘅堅持，你堅持人哋先過我，我堅持唔食走人，可以話我小器。再一次強調，成件事大家都好有禮貌，冇人發過任何脾氣，冇乜肉酸野發生，我喺度純粹發少少牢騷。