大和豚総本店 (已結業)

早排约朋友食饭, 去咗喺旺角雅兰一楼有多国菜可以食嘅大和豚総本店dinner. 本身以为有大和呢两个字, 就以为系日本餐厅, 但原来唔系。平日夜晚7点几到, 门口唔算多人, 等咗未够1分钟已经有侍应带我地入座。餐厅嘅座位都几阔落, 而且张枱都几大, 可以叫好多野食又唔会太迫。叫咗个138蚊嘅吉列猪扒饭set, 跟餐连一碗味噌汤同埋前菜。前菜用有三格嘅小碟装住, 分别有三文鱼、泡菜同埋腌青瓜粒。三文鱼唔算太新鲜, 但以前菜质素黎讲可以接受, 味噌汤同泡菜亦都一般, 反而系腌青瓜粒几有惊喜, 饭前食几开胃。主角吉列猪扒饭块猪扒好大块, 佢用咗面包糠而唔系一般炸粉同炸浆去炸, 所以包住猪扒嘅外皮唔会太厚, 亦无抢咗猪扒嘅肉味。建议猪扒要连埋生菜一齐食, 可以解油腻。饭量太少, 可能猪扒送饭好快将块猪扒食哂, 只食猪扒会有少少干。店员服务态度唔错, 环境以旺角闹市嘅铺头黎讲算比较好, 加上有唔同款式嘅野食, 呢间餐厅可以试。