Balaboo (已結業)

本身住喺附近，知道厚德街市装修咗，入面多咗啲细舖，呢头终于有个正常少少嘅地方可以扫街下喇。今日俾我发现到呢间小店除咗有咖啡、牛奶布甸之类嘅甜品之外，仲有我最钟意嘅姜汁撞奶，仲要唔太贵，都算街坊价。咁就试咗个姜奶先，因为佢哋唔系预先炖好嘅奶，而系真系即刻搅烂啲姜，煲热啲奶，再倒落个盎度。老细一个人又要serve客，又要煮，都算几快手。因为我想坐喺吧台度食，佢连埋个盘上，就咁睇完全唔似街坊货色。个撞奶姜味好出，应该用咗老姜，但辣味唔算好呛喉。佢用本地农场奶，都算滑溜，不过奶味唔太香浓。同埋佢系即撞，冇落到蛋白，所以奶唔系凝固得好实净𠮶款，但我几钟意，质素唔比义X牛奶公司逊色。