COBALT

营业中

休息中

朋友以前系呢头返工，同佢重游旧地行下酒吧街，意外发现呢间新店，食物出色、餐酒好岩我口味，居然不过系一般西餐嘅价位，未食完已经话想再黎。芝麻吞拿鱼沙律作为套餐嘅前菜，无论份量同摆盘都好唔错。 沙律菜新鲜爽脆，幼嫩嘅吞拿鱼厚切，满满咁用黑白芝麻包裹，口感丰富，鱼味同芝麻香都好突出。虾多士就咁望个名仲以为系普通嘅炸虾胶多士，嚟到好似虾汤咁真系吓亲，但竟然系全晚最有惊喜。 蒜辣椒橄榄油嘅煮法虽然听落同平时嘅tapas差唔多，但完全唔油腻，反而好似熬左个好浓郁嘅虾汤咁，蒜片同香料好香，大虾新鲜弹牙，同朋友一致认同会为左佢再黎。南瓜姜汤讲真个姜字我有少少却步，食落真系有好明显嘅姜粒，但估唔到真系好夹，姜只有香味而唔会太辣，令到平时得个甜字嘅南瓜汤更加有层次。三文鱼柳煎得好香，虽然好厚但仲保持到嫩滑有肉汁，底下仲有脆脆嘅鱼皮好香口。 番红花意大利饭够晒湿润Creamy，我食到系有啲姜黄粉味，味道温和都容易接受，仲有啲杂菌同瓜好有咬口。我最期待嘅开心果雪糕冇令我失望，开心果味超浓，亦都冇乜果仁皮嘅苦味，浓厚幼滑creamy，值得一试。