Outback Steakhouse (奧海城二期)

营业中

休息中

同老公拍拖拖行到去奥海城嘅outback,望下个餐牌几吸引， 就决定喺度Tea一tea.打开餐牌二话不说拣咗一香辣炸鸡锤，跟住系猪肋骨同鸡肉夹饼之间挣扎一轮后，最尾都系拣咗鸡肉夹饼。可能今日都比较多人，叫完嘢食后都要等一段时间，好彩追加左个黑糖面包，有嘢可以顶住肚先。呢个咁受欢迎嘅黑糖面包都唔需要多介绍，我老公最钟意食，转眼间已经比佢K.O.左。再等多一阵个鸡锤就黎，可惜到既时候只系微暖，平时热辣辣嘅话再点埋个芝士酱汁，简直系魔鬼嘅诱惑，食极唔停，但系而家冻左就真系大打折扣⋯好彩芝士鸡肉夹饼仍然保持水准，一碟有四片夹饼，切开半溶嘅芝士做到拉丝效果，啖啖鸡肉，配埋佢嘅蜜糖芥茉酱，真系好好味！ 伴碟仲有一篮炸薯条🍟同醋油浸过嘅蕃茄仔，特别醒胃！随餐仲有饮品，两个人食百几蚊，搞到我晚饭都争啲食唔落，呢个下午茶的确系性价比高！比个贴士大家，想嚟食嘅朋友仔注意呢度比较多人，如果正正三点嚟，需要等一段时间，唔想等嘅朋友可以早啲排队或者迟啲先入座。