黃金燒味 (已結業)

不嬲都好钟意食烧味，听朋友讲湾仔呢间新开嘅黄金烧味好食，所以就决定放工过嚟试吓。我哋嗌咗个二人套餐，只系二百零蚊，有老火汤、有饭，有嘢饮，仲有超多款𩠌，真系好抵食。我哋拣咗乳猪拼肥㶶腩叉、鼓椒蒸黄花鱼，个餐仲包埋凉拌卤水拼盘同埋骨汤浸时蔬，分别系凤爪加黑木耳同埋蚝油菜心。老火汤都几大碗，饮落好香浓，而且好足料。佢嘅乳猪皮超级脆，配埋甜甜地嘅酱汁，用嚟送饭一流。落单嘅时候，店员提过我哋话肥㶶腩叉啱啲钟意食肥叉烧嘅人，我哋梗系要嗌嚟试吓啦。上枱嘅时候果然冇令我地失望，啲叉烧肥得嚟唔会太腻，真系好正。黄花鱼比想像中大条，卖相超靓，而且仲好香。啲鱼肉好滑，食得出系好新鲜嘅鱼。凤爪份量够多又大件，口感唔错。蚝油菜心都好新鲜，冇乜油，感觉好健康。另外我哋仲嗌咗酒香汾蹄，份量都好多，食到微微嘅酒香，配埋酸酸地嘅醋，真系忍唔住食咗好多件。鹅颈头都好大份，好香口，建议用嚟送酒。佢嘅杏仁茶都好香好好饮，值得一试。