XOXO Café Lab (已結業)

 去坑口买完嘢，揾个坐得舒服啲地方，去咗xoxo cafe，又好钟意佢哋𠮶啲好有创意嘅食物。今晚想食得轻盈啲，所以要咗个all day sandwich，里面有烟三文鱼同埋烟腿，三文鱼同烟腿都好大块，配上三层面包 ，饱就足够嘅，烘到香脆，食起上嚟特别开心，最特别嘅系顶层嘅面包加咗发到好高嘅蛋白，卖相非常抢镜！蛋白入边种窝咗一只流心蛋黄，营养加分。当中都有 蔬菜，平衡返成个三文治嘅营养。好钟意食鱿鱼，但系炸嘅又嫌太热气，所以要咗个七味烧鱿鱼。外脆内软，肉质 弹牙， 七味粉轻轻洒在上边，但又唔会太过浓烈盖住咗鱿鱼嘅鲜味，值得一赞。 分量比较细，小食多滋味！饮品系热嘅蜂蜜柠檬水果茶，喺突然间冻到得返几度兼非常干燥嘅冬天，用蜂蜜滋润，十分重要；加啲柠檬，多啲维他命c，等身体都强壮啲，减少感冒嘅机会。水果种类好丰富，有唔同质感，咬口一流 ，颜色亦都够吸引，味道好之余，打卡呃like都唔错！