魂 (已結業)

前几日同女朋友行过太子旺角警署𠮶边，佢话好想食拉面，所以试咗呢间新开嘅拉面，原来系喺铜锣湾鹅颈桥𠮶边搬过嚟，都系呢几日先开返。成个环境好舒服，装修好有日本风，每人嗌咗一碗，啲面同酱油又有得拣软硬度同浓淡度，有啲似一兰。我要咗太极，女朋友要咗魂，等咗一阵就嚟，速度都几快。两碗面个猪骨汤底都好浓，值得留意嘅系佢嘅特色就系个汤底比一般汤底杰，几有猪骨味，汤汁适中，又唔算太少，不过可以多啲。啲面比其他拉面更加粗，而且唔系直嘅，挛挛地咁，大概就好似出前一丁咁，女朋友就嫌太粗，不过我就几钟意，因为可以挂起更多汤汁，更加好食。两碗面都有一大片紫菜,叉烧同玉子(溏心蛋)，叉烧冇雪味，而且size都几大，蛋都唔错，唔会话熟过头咁样，听老细讲系之前用过唔少其他蛋，效果麻麻地，最后先用咗日本蛋，唔怪之得咁有蛋味，老细话最好大啖咁食，咁就会有清凉嘅感觉。面质方面，我地要左硬嘅面质，嚟到又真系硬嘅，酱油味道都几适中，我𠮶碗太极有埋蟹膏，同啲墨鱼汁都夹，不过墨鱼汁浸味就唔太出喇。总括嚟讲，呢间舖又唔算太贵，食物质素又ok，都值得下次再去嘅。