佳佳甜品

营业中

休息中

上一份工成日要去永安百货，同事就介绍嚟佳佳。传统糖水无咩巧妙，最重要系用心煲，无渣漏摊就得，无奈香港好多糖水舖都系是是旦旦，自己平时都少食咗。咁岩呢日同两位朋友去佐敦附近，又嚟一次佳佳，九点钟都系要排队，但好快就入座。原意叫核桃露加汤圆，可惜卖完，唯有转芝麻糊。芝麻糊滑而不过甜，浓浓芝麻香，无花巧，就系水平之上。汤圆都系芝麻馅，外皮煮得刚刚好，唔会未煮透痴牙，又唔会煮过火太烂。同行朋友叫咗蛋花马蹄露同粒粒红豆凉粉，马蹄露我就无试，红豆凉粉嘅红豆唔系红豆沙个只，有咬口，连凉粉同吃又有一番特别口感，算系传统中有新意。服务算系还好，落单细心，会再三确认以免送错。虽然无赶人走，但整体嘅气氛都唔系容得下人久坐，同其他糖水舖一样。呢样就睇嚟系成个香港既问题了。