北海道爐端燒 (已結業)

北海道炉端烧系亚士厘道，喺尖沙咀地铁站行过去只系几分钟时间，真系好方便。一入到去就见到好多日式灯笼，成间舖嘅装修好特别，好有日式风味。首先一定要推介嘅就系佢嘅海胆鱼籽蟹肉蟹膏烧。佢嘅卖相真系超级靓，海胆、三文鱼子同蟹肉够晒鲜甜，而蟹膏就带有海鲜嘅咸味，四样嘢嘅味道非常夹，一次过将佢地摆入口，真系好正。另外我哋嗌咗佢嘅左口鱼边寿司，左口鱼充满油脂，入口即融，同一般嘅连锁寿司店嘅左口鱼真系有好大分别。如果系钟意食左口鱼嘅话，个人认为呢样系必嗌嘅菜式。炸日本生蚝一共有五只，每一只都炸到热辣辣脆卜卜，啲炸粉唔会好厚，真系做到外脆内热，而且食得出啲生蚝好新鲜，一啲都唔腥，点埋佢特配嘅酱汁，真系好好食。油甘鱼刺身又厚又大件，色泽同纹路都好靓，鱼肉非常鲜甜。炙烤三文鱼押寿司一共有六件，系本身已经有酱油嘅寿司饭上面摆上厚厚嘅三文鱼，将三文鱼炙烧之后再加上三文鱼子，同一般嘅卷物好唔同，非常值得一试。最后我哋嗌咗个好足料嘅带子鱿鱼烧，上面有好多紫菜同埋木鱼丝，蛋入面就有好多带子同埋鱿鱼，配埋佢嘅沙律酱同烧汁一齐食，真系好有日式风味。希望下次有机会可以试埋佢其他菜式啦。