相撲手日式放題 (已結業)

今日一到放工时间就即刻拎袋走人，事关约咗朋友食放题。今日嘅餐厅叫"相扑手"，第一次嚟唔知质素如何呢？一去到店员就安排咗我哋坐窗口位，位置好阔落，唔会叫多少少就摆唔落。食物选择有好多。打头阵当然系点刺身先啦。第一回点咗马刀贝、带子、荣螺、呑拿鱼、三文鱼等等，嚟到嘅时候嘅数目有俾足㗎，而且鱼类嘅系厚切。我个人好喜欢食马刀贝，依度嘅切得几大块，好爽口而且鲜甜。带子亦都唔错。每次放题我都会叫枝豆食，不过有啲餐厅会烚到淋哂，又或者俾得太多盐去整，依度嘅枝豆烚到啱啱好，最后我差唔多成碗食哂。牛油清酒煮蚬系我叫嘅，原先谂住只系俾一碗仔几粒，点先上菜时见到系一锅好多粒。味道上算ok啦，如果少啲牛油味，多啲清酒味会更好。串烧类我好推介俾大家，尤其系菠萝同猪肉。菠萝好甜好多汁，要赞佢唔系罐头菠萝，有菠萝皮一齐烧㗎。串烧猪肉烧完都仲有唔少肉汁。临尾我地两个都战斗力下降，叫亲都系一件起两件止。我最后叫多旧芒果软壳蟹卷，啲芒果好甜，同软壳蟹非常夹。点解隔离枱都系两个女仔，可以食足两个钟，而每次都叫劲多又食得哂？店家好有心有炖汤同炖蛋送，两个都好好味呀！