NUTTEA (鴻力工業中心)

营业中

休息中

同屋企人过去mega box买嘢，途经见到门面装修几简约风格嘅饮品店，无留意系饮咩就入咗去啦。原来系一间主力卖坚果奶盖嘅饮品店铺，芝士奶盖就饮得多，坚果奶盖反而未听过，好好奇到底系咩味道，即刻叫两杯试吓。有好多款口味可以选择，仲有唔同嘅甜度同冰度，而且店铺好干净整洁。见到有夏季限定嘅芒果🥭就叫咗一杯芒芒坚果奶盖茶。芒芒坚果奶盖茶微糖走冰除咗上面嘅芒果肉粒，杯底系由好多芒果肉打成嘅茶底，每饮一啖都食到啖啖芒果肉。坚果奶盖好浓密好厚身，密度咁高，所以呢个奶盖可以话系用嚟食而唔系饮，而且好重nuts味。店员提醒可以用呢旧嘢去不啲奶盖食，卖相好得意。缤纷火龙果坚果奶盖茶走甜走冰走甜反而更加饮得出火龙果本身嘅清甜味，水果好新鲜，全部都系真材实料，果肉好多，坚果奶盖又好奶香好滑，配搭水果又可以解腻，出奇地夹。仲好细心咁贴咗张纸教人点饮，下次再试吓坚果奶先。