尚上下夏 - 養生雞煲火鍋 (已結業)

期待已久的长假期终于来临, 同事一行4人一早已经约好食鸡煲贺一贺去! 4个都系鸡煲边炉怪, 又钟意食辣, 做晒资料搜集就黎呢间尚上下夏养生鸡煲火锅试下喇. 假期前夕座无虚席, 非常热闹, 但店家上菜速度都唔慢. 坐定定好快有得食. 鸡煲一上枱已经好香, 配料亦都非常丰富. 我地各有喜好, 于是拣咗半边净鸡脾, 半边净鸡胸, 分别系中辣同小辣. 呢间鸡煲值得一赞的地方系, 鸡件炒得好香口入味, 而且一D都唔鞋口, 尤其系鸡脾个边, 每一件都好滑好入味, 配料亦都好充足, 成个鸡煲都好浓味好够味! 辣度方面一D都唔可以睇小, 小辣个边初时无乜野我地仲嫌唔够辣, 一味食中辣个边, 但慢慢食落先知劲, 个种辣味系越食越辣, 最后大家都食到雪雪声! 加埋佢有阵好香的花椒麻味, 辣得好有层次, 搞到我地班港女越辣越想食. 食到中段先发现有意外惊喜, 就系--->猪皮, 猪皮系锅低煮到入晒味, 实在系成个鸡煲精华所在 鸡煲份量一D都唔少, 食完已经半饱, 下半场打边边只能叫D蔬菜同少量肉类黎食, 个个食到揽住个肚!