王子私房菜

营业中

休息中

留意返，要善用网上攞飞等位，女士同老友记需备外套，坐近风位时可保暖。呢度坐得舒服，枱同枱之间留有一定空间。店员非常有礼，服务周到，唔会chur住咩都快，气氛好适合休闲叹点心。小食话梅粉番石榴同XO酱可以拣唔要，开茶时同店员讲声就会攞走，唔会记数收钱。老友记发现咬得开番石榴片后好开心，亦钟意佢甜甜酸酸好醒胃。大力推介叉烧包，入面有好多细片状叉烧，同肥膏多过肉或者汁多过料的包包有明显分别，系近期食过最真材实料的叉烧包。萝卜丝酥饼外层松化，最欣赏萝卜丝系幼身版，有一种食得出的细致感。中山王子鸽选用BB鸽，肉嫩够入味，牙力唔多好的老友记都可以轻轻松松KO咗半只，仲食得好滋味添。三色肠粉皇卖相好，尤其只若隐若现大虾。食落最好味反而系叉烧同牛肉，牛肉有香浓陈皮味，甜豉油调味适中易入口。翡翠带子饺、虾饺同咸水角普普通通咁啦，老友记一锤定音话另一间的虾饺好味啲，下次由佢带队去试吓。