瀛喜日本料理 (已結業)

琴日同家人去咗元朗嘅大瀛喜食放题，一入到去环境唔错，光线几充足，梳化亦都几舒服。墙上亦有一幅好和风嘅画，都几有气氛。钟意饮嘢嘅我入到去梗系叫嘢饮啦，佢嘢饮嘅选择都几多，上至可乐、啤酒等罐装饮品，下至蜂蜜绿茶、乌龙茶等纸包饮品，都好齐全，最特别嘅系佢竟然有新出嘅锡兰柠檬茶，如果唔想饮冻饮，仲可以饮热饮，有润喉清热嘅柑桔蜜同姜蜜，款式多样化，任君选择。我地叫咗好多嘢食，几乎全部都有试过，包括：刺身、创作寿司、海王翅、手卷、沙律、天妇罗等等，真系非常多，我几欣赏佢啲手卷，全部都的的骰骰咁，几啱想尝鲜又唔想食太多嘅人。另外，我想推介大家食牛油粟米，几浓味，几好味，只系份量好似多咗少少。而我最钟意食嘅就系佢个烟肉包烧蚝，烟肉同蚝嘅味好夹，蚝好多汁，亦好香，呢个菜式亦非常有创意，之前都未见过。另外，甜品虽然选择唔多，但胜在几特别，冇系其他放题食过，有雀巢雪糕杯、多种味道嘅雪糕糯米滋，同埋好耐冇见嘅大脚板雪条，简直系童年回忆，好够冻。因为太够冻，所以我建议大家早啲叫雪糕糯米滋呢瘫热下，等佢融返少少再慢慢品尝，就唔会太硬而咬唔到啦~