爆丼丼 (已結業)

早排父亲节去荃湾同家人庆祝，已经留意到哩间爆丼丼，于是乎衬得闲去帮衬吓。想去帮衬，当然有原因啦，因为见到佢店入面d海报超吸引，碗饭上面铺满海胆同刺身架，近排食咗几间唔掂嘅餐厅，希望今晚食翻餐好啦！极上生鱼丼，四重爆丼，蟹籽沙律同盐烧三文鱼头各一客，开餐啦！生鱼丼嘅三文鱼腩唔系薄切系厚切，即使赤虾刺身，帆立贝等等，都系足份量无偷工减料，四重爆丼上铺满海胆，帆立贝，三文鱼籽，拖罗碎放最顶，海胆，三文鱼籽同米饭一齐放入口，美味充满成个口腔，超正超美味！其实单单睇两碗饭，已经系视觉享受。近年食蟹籽沙律，发觉好多餐厅提供嘅蟹籽份量都少咗，但爆丼丼无哩个问题，蟹籽份量足够。每次食三文鱼头，都唔会点失望，哩次都唔例外，望上去烧得够㶶，我中意烧得㶶d，食上去香脆d，鱼头亦烧得够肉质嫩滑，唔错。我影完相之后，即刻 send 俾日本大阪朋友，问佢日本有无哩类食法，佢话日本无哩种架，佢睇到都话正，羡慕死佢！