湯飽皇 (已結業)

之前喺到食过二次晏，觉得都几好食，而且价钱公道，于是星期日晚拉队嚟试下。一共七人，叫咗个六个餐($528)，因为大食关系，重加咗半只山东烧鸡，同一个叉子烧饼餐。六人餐份量几足，如果冇记错计计埋埋有八样嘢。三冷盘有醉鸡、拍黄瓜同海蜇，每样水准唔错，特别系醉鸡酒味够香，而鸡肉亦颇嫩滑。松子鱼个汁甜酸平衡刚好，鱼亦唔会炸得过火；云吞鸡份量足，汤亦颇鲜。有一味芙蓉菜卷系用菜叶包住蛋白，煮熟再打个献，因为太饱冇食到，但见到都几花功夫。汤包因为得六只所以我冇食，但有食过嘅话几好，个汤汁够鲜。有xo酱蛋白炒饭，有少少辣，十分惹味，饭亦炒得好功夫，不油而粒粒分明，我自己食咗成半碟，所以好饱。甜品系高力豆沙，因为唔食甜品所以唔知味道，但同枱人都话好。个餐六个人食份量应好足。山东烧鸡好食，个汁嘅蒜味够香而唔会太抢，鸡肉亦保持到唔鞋，水准作。而叉子烧饼上碟时热辣辣，表面充满芝麻，芝麻香味再加埋肉丝嘅味道，个个话好食。而随餐嘅酸辣汤就好一般。呢间小店食品水准唔错而有诚意，而且价钱公道。招呼就好家庭式；地方企理干净但细，最大张枱只刚坐到七个人，一家人普通食饭都系几好嘅选择。