飯飯包掂 (已結業)

难得今日放早，就梗同男朋友拍拖行街。朋友介绍粉岭有间新开嘅黄店个lunch好出色，但我地行完街已经食晚市，所以就试唔到个lunch。上次朋友食lunch选择好多，有石头锅饭、铁板餐、焗饭、意粉等等。人均$50包野饮，真系好抵。tea set仲有鸡肶、鱼柳包同热狗好多选择，仲唔使加一，真系好吸引。我哋晚市就主打酸菜鱼、鸡煲、烤鱼同胡椒猪肚鸡四款主食，另外仲有火锅配料可以加。我就拣左酸菜鱼小辣。酸菜鱼嘅鱼片系鲩鱼片，配料有豆卜、木耳，仲有好少见嘅油扬。店员仲好细心咁问我哋汤底够唔够酸、辣，如果唔够可以随时同佢讲，咁贴心嘅服务边度揾！先讲个鱼片，肉质好嫩，而且厚薄适中，太簿会一夹就断，太厚又唔入果，呢个size就啱啱好！以为鲩鱼片煮耐左会散唔好食，佢份量实在太多，食左半个钟都仲未食晒啲鱼，食到后期肉质依然鲜嫩。配料方面，木耳爽口酸中带麻，豆卜就嗦晒汤底嘅味，薯粉烟韧有咬口，又够酸，愈食愈好食。另外仲叫左菊花茶，但系用Hoegaarden杯上。