千歲擔擔麪

营业中

休息中

未够老江湖食过大磡村年代嘅咏藜园，只食过搬去蔡澜美食坊嘅嘅担担面版本，已至少系十年前嘅事，当时觉得不怎么样。到今日，缘份到了，自然又食到进化版——新裕民坊版本。大厅约15枱包括2、4、6人枱，正门右边一间贵宾厅容纳12人大枱一张。侍应姐姐个个都好快手，奉洗碗水、奉茶、上菜都火速，落单清楚。唔驶$40食番声称原版担担面，同行食过大磡版本之长辈话已经好接近，只系当时汤会少啲但浓稠啲，新版汤就多啲、清啲冇咁重口味，啱番依家祟尚健康饮食要求。始终系佢地嘅担担面花生酱味浓郁过其他舖，辣嘅程度系微辣。呢个价钱，面底预咗细，大概儿童份量。好怕啲鲩鱼类物体腥到喊，胆粗粗叫咗功夫熏鱼，8块两只食指并排咁大左右，甜甜脆脆，内里软熟，起势夹完食完再夹。红油抄手较得个汁底微甜，比辣担担面稍辣，又系食到爱不释手，如果加埋葱花就更完美。上海粗炒椰菜肉丝粗面条条分明，唔会有啲酱芡堆埋一旧旧。基本上上述连小笼包都食到照哂镜。