生記飯店 (已搬遷) 新店位置

今晚一行七人生日饭，拣咗湾仔生记。咁多年来，呢度都系保持传统粤式酒楼格局，简简单单，企企理理。每次生日饭局，都系放尽去叫，大擦一餐。嚟呢度指定菜式一定叫盐焗鸡、生炒骨、姜葱猪膶。盐焗鸡原只上，外皮焗得带点脆，鸡肉干身咗少少，唔够咸香嫩滑。生炒骨就保持一贯水准，甜甜酸酸好味道。姜葱炒猪膶最出色，猪膶爽滑不嚡口，一上枱，即被秒杀，同枱人连姜葱都唔放过，可想而知有几滋味。酥炸筒蚝热辣辣登场，炸浆厚薄适中，不过味道就寡咗少少。豉汁蒸鱼云好惹味，同白饭系最佳配搭。上汤竹笙浸豆苖，普普通通，不过不失。豉油王炒面有水准，出色之作。泥鯭粥够鲜味，粥底绵腻，不俗。饭后甜品仲奉送一大碟白糖糕，清甜中带一点酸，完全系儿时的味道，童年回忆返晒嚟。