韓膳宮韓國料理 (已結業)

就快到秋天季節，身邊嘅朋友又開始講緊食大閘蟹...講開食蟹令我念念不忘嘅 ，係幾個月前有一次係觀塘嘅韓國餐廳食咗一隻生既醬油蟹。食生蟹嘅感覺係蟹肉嘅肉質黏黏嘅，又軟綿綿既。經朋友介紹尖沙咀呢一間韓膳宮韓國料理, 都有醬油蟹食, 所以就急不及待咁book咗枱，希望再食多次韓國人嘅醬油蟹。由於係平日，客人並唔多，入到呢間韓膳宮韓國料理, 感覺佢似去咗人地嘅屋企甘，除咗抬頭嘅燈飾比較有藝術感之外，所有嘅裝修都好似係屋企咁平民化，裝修簡單利落，不遠處有部電視播放劇集，所以感覺自在。餐牌付有圖片，有散叫又有套餐，選擇幾多價錢合理。菜式豐富又有圖片，簡單易明，最適合我哋呢啲睇圖片叫菜既懶人。落左單後，冇幾耐店員就將六樣韓式前菜放係枱面，見到呢排小碟，終於感覺有啲似喺度食韓國野啦！..食韓國嘢當然唔少得叫韓國嘅米酒—農酒，雪白嘅韓國凍農酒，清新微甜，飲起嚟非常清熱解渴，配搭韓國燒烤簡直係最佳拍檔，甜甜嘅農酒入口非常順暢，感覺冇咁熱氣。飲韓國農酒，我覺得比任何韓國燒酒更暢快，而且價錢才95元，一大樽，两人飲足成晚！我地急不及待咁叫左醬油蟹，醬油蟹的汁除醬油，砂糖，蒜蓉外，仲加左啲酒，所以味道香醇濃厚。