阿元來了 (已搬遷) 新店位置

非常喜欢去台湾旅行，成个旅程使嘅钱同去澳门过夜差不多。尤其是台北，行街食嘢咩都有，满足唔同嘅朋友仔都可以！台湾乜嘢食都有，平贵任君选择，但其中一样我最喜欢嘅系鲁肉饭，台币十蚊就有碗，细细碗做早餐或下午茶一流！心血来潮好挂住鲁肉饭，但又无得去台湾，点算好？呢间小店完全满足我嘅心愿啊～同男人去阿元来了，点咗两个饭，分别系鲁肉饭同焢肉饭。先讲鲁肉饭，佢唔系肉碎状，而系带少少肥嘅肉丁，非常入味，有时好怕食呢啲捞汁嘅碗饭唔够汁，呢度刚刚好，亦都有好多肉丁，绝对足够当午餐～只系略嫌多肥咗少少，食完有啲腻！另一个就系焢肉饭，食落去似扣肉嘅感觉，应该用五花腩做，味道香浓。但同上面一样，多吃会有少少油腻感。去台北必点嘅肉羮，呢度份量唔算细，两个人分享下都可以。味道OK，但太重笋味，我个人就觉得有少少呛喇！盐酥鸡都系我飞佛，呢度都有成六、七件，即使多一两个朋友仔点小食Share都OK！味道方面都非常地道，另一可改进就系有啲大件，如果做到一口食哂一件就更perfect ! 埋单都系百几蚊，已经叫埋饮品，都几抵食呀！一定会返转头呀！