影片
更多
2016-09-21
1645 浏览
今个中秋，难得大部分屋企人都放假，梗系要去玩下。行山呢类有益身心嘅活动，当然一呼百应啦。不过，正所谓：「假日通街都系人，离岛人多到陆沉」，仲要我地有老有嫩，究竟去边度好呢？左谂右谂，最后都系决定去南丫岛。行程中最头痛就系决定喺边度揾食。虽然香港出名食海鲜，但作为香港人，我地好清楚，香港地可以食到货真价实海鲜嘅地方，其实唔多，有啲甚至随时附送黑脸。所以一直以来去得食海鲜，预咗银包大出血之外，呃抨、味精都实走唔甩。但今次连平时零运动嘅70岁老爸都肯一齐行，对我地黎讲系一个历史性创举，个震撼度，绝对劲过"亮黑版唉疯七📱"。所以行完之后，点都要揾啲好嘢孝敬佢老人家。当谂到头就黎爆，突然谂起一位喺南丫岛返工嘅朋友。佢一年逗留喺南丫岛嘅时间，仲多过喺香港岛，绝对可以称得上半个南丫人，加上佢自己煮得两手，对食物有返咁上下要求，于是立刻Whatsapps 佢，求佢指点迷津。朋友强烈推介「榕树湾 - 民丰」，仲叫我一定要点「糯米蟹煲」。以往入南丫岛，惯性喺岛嘅另一边揾食，比较少拣榕树湾。但既然系朋友推介。好！就一于试试...当日我地5大3细，分别点咗：白灼虾、清蒸石斑、糯米蟹煲、辣酒东风螺、牛油炒蚬、风
不过，正所谓：「假日通街都系人，离岛人多到陆沉」，仲要我地有老有嫩，究竟去边度好呢？左谂右谂，最后都系决定去南丫岛。
行程中最头痛就系决定喺边度揾食。虽然香港出名食海鲜，但作为香港人，我地好清楚，香港地可以食到货真价实海鲜嘅地方，其实唔多，有啲甚至随时附送黑脸。所以一直以来去得食海鲜，预咗银包大出血之外，呃抨、味精都实走唔甩。
但今次连平时零运动嘅70岁老爸都肯一齐行，对我地黎讲系一个历史性创举，个震撼度，绝对劲过"亮黑版唉疯七📱"。所以行完之后，点都要揾啲好嘢孝敬佢老人家。
当谂到头就黎爆，突然谂起一位喺南丫岛返工嘅朋友。佢一年逗留喺南丫岛嘅时间，仲多过喺香港岛，绝对可以称得上半个南丫人，加上佢自己煮得两手，对食物有返咁上下要求，于是立刻Whatsapps 佢，求佢指点迷津。朋友强烈推介「榕树湾 - 民丰」，仲叫我一定要点「糯米蟹煲」。
以往入南丫岛，惯性喺岛嘅另一边揾食，比较少拣榕树湾。但既然系朋友推介。好！就一于试试...
当日我地5大3细，分别点咗：
白灼虾、清蒸石斑、糯米蟹煲、辣酒东风螺、牛油炒蚬、风沙鸡、金𥖁豆腐、扬州炒饭
先讲讲点餐情况，因为3位小朋友，分别强烈要求食白灼虾、蒸鱼、扬州炒饭。既然小朋友要求到，冇理由扫佢地兴，加上其中一个小朋友系扬州炒饭迷，人仔细细可以鲸吞一碟炒饭。所以我二话不说要求扬州炒饭「加大」。
原来仲打算叫埋「椒盐濑尿虾」，但落单嘅店员竟然话：「其实你地已经有白灼虾，再点濑尿虾，好似有点重复。而且你地只得5个大人，不如帮你连个风沙鸡都改埋要半只。好吗？」
我当然答好，但心谂，呢个伙记都几特别。我以往去食海鲜，对方理得你啲海鲜有冇重叠，更加唔会谂你食唔食得晒，佢地净系会话：「惊食唔晒？果度唔系好多嘢咋㖞。想食椒盐濑尿虾呀？无问题，两只都整到.....」但民丰嘅伙记，竟然有钱唔赚？？
后来我先知道，呢位帮我落单嘅伙记，原来系民丰老板。我真系有眼不识泰山@@
无几耐，𩠌菜陆陆续续送到....
先来"金𥖁豆腐"
原先我对呢碟豆腐没太大期望，点知原来劲好味！炸皮不厚但脆，豆腐超软滑。
"白灼虾"
只只鲜甜弹牙（无错，系只只）
以往食亲白灼虾，一斤总有4、5只霉肉死虾，但呢碟白灼虾，真系只只都鲜甜无比。小朋友们更一只接一只，口中都未呑完，已问碟上剩返嘅，可唔可以留比佢地食。
"牛油炒蚬"
蚬大只冇沙，只只开口不在话下。牛油炒都冇抢走蚬肉鲜甜味。甚至连同炒嘅洋葱都好味到可以捞一碗饭。
"辣酒东风螺"
我自己本身唔太钟意食螺，总觉得平时食嘅螺肉好硬好顶胃。但呢碟完全冇得弹，螺煮得刚刚好，肉质软熟。碟中另一亮点，就系垫㡳嘅葛粉，完全吸收晒整碟辣酒螺嘅精华。超级惹味！赞！
"风沙鸡"
貌似炸子鸡。初初以为啲肉应该会几鞋。殊不知连鸡胸都皮脆肉滑，味道又刚刚好，唔会太咸。
"糯米蟹煲"
是晚主角，果然冇令我失望。
先讲讲个蟹，蟹肉质地饱满、结实，绝不是水蟹。
糯米饭，粒粒饱满分明，没有黏埋一pat pat， 完全没有油腻感，连食两碗亦唔觉漏。（朋友果然冇介绍错。正！）
仲有一点值得一赞，糯米饭完全没有蟹壳碎。食蟹煲，好味固然重要，但如果爬爬下饭，咬到蟹壳，立刻乜嘢feel都冇哂，净系feel到好烦！
"清蒸石斑"
鱼蒸得刚刚好，但因为之前几碟实在太出色，所以相对之下，冇乜嘢写。
"扬州炒饭"
呢个饭，我主要赞嘅唔系味道，而系细心和智慧。老实讲，我真系冇谂过啲海鲜咁足料，食到个鱼，我地已经饱咗7、8成。但落单嘅时候，因小朋友钟意食炒饭，所以我要求加大。正喺度谂紧一阵碟King size 炒饭点算，肯定食唔晒，实要打包嘅时间。
老板送上炒饭时，竟然话：「我担心你地食唔晒，所以帮你改返例牌，宁愿一阵唔够先再加」
老板一定系见惯人，佢洞悉到我呢种人「为食又贪心，乜都想试匀」，但又唔理食唔食得哂。所以佢当机立断帮我改返做例牌。如果唔系佢细心＋有智慧，我谂我实要对唔住地球先生（用外卖盒）。
食埋老板送嘅果盘，我地就好满足咁去搭船返中环。老爸搭船果阵，猛话个蟹煲超好食，个糯米饭冇得顶，白灼虾鲜甜又弹牙，牛油炒蚬唔止香，连D洋葱都好好食......（下删500字）
今年能够有个小朋友又开心，老人家又满意嘅中秋家庭乐，全靠朋友好推介。但作为好友，有咁正嘅地方竟然唔一早讲，你话系唔系离谱吖。
****
我从来冇谂过自己会写食评，
亦唔认同相机食先嘅潜文化。
因为我成日觉得一碟热辣辣、香喷喷嘅食物递到你面前，你竟然可以......比 iPhone 食先？？ 你话iphone有味蕾就话啫=.=#
所以呢篇食评会系零图片。
但因乜解究我今次会写咁大篇嘢？
原因系「香 港 终 于 有 名 物 喇 ！」
以后有外国朋友黎香港，我可以带佢地一尝 香港真•出色嘅海鲜喇!
张贴