聚豪軒

营业中

休息中

谂唔到去边度饮茶，屋企人话呢度开咗间新酒楼。入咗座之后先见到原来同屋企附近一间酒楼系同一集团，早知就唔使嚟咁远。话虽如此，但系睇佢下午茶张纸有几多唔同嘅特色嘢，咁就拣咗几样嚟试吓。紫薯咸水角，食唔到紫薯味，但系都几多馅又热辣辣。个印度脆香沙律球，出边脆卜卜几得意，但系沙律里便就剩系得生果就单调咗少少。个上汤虾饺大大粒啲虾肉都几爽，不过个汤就冇乜味。另外个锦卤云吞里便大大只虾肉，确系满足嘅。不过如果有啲怀旧款式嘅锦卤云吞就好，即系啲酱里面仲有其他材料，不过而家啲酒楼真系好少有。杏汁鲜竹卷，杏仁味唔算好出，对于唔好杏仁糊嘅我还系可以接受。香蕉包都几特别，里便疑似系香蕉蓉食落去口感几淋滑。爽肚都好难得佢整得够入味，出边好多酒楼都系酱还酱，肚归肚。个烧肉濑粉啲烧肉下午茶嚟讲，都够脆身系值得一赞。不过个干炒牛河就淡口少少冇乜镬气。最有惊喜反而系个陈皮红豆糕，真系有陈皮味，唔太甜好似食咗碗红豆沙落肚咁。不过就唔系好钟意佢啲枱坐得好逼夹，一个枱号都分A B枱。