Bostonian Seafood & Grill (已結業)

8周年纪念，谂咗好多唔同选择，又问咗好多朋友，最后都决定嚟呢间餐厅，虽然冇好靓嘅景，但系环境装修都唔错嘅，仲有佢哋最出名嘅龙虾汤同埋海鲜塔都系我两公婆嘅至爱。𠮶晚加上系平日冇乜人，真系可以好好咁享受两个人的晚餐。头盘我哋点咗经理推荐嘅crab cake，一食果然冇介绍错，真系好好味，丰富嘅蟹肉又有鲜味，正！好啦，跟住之后就到海鲜塔，虽然种类唔算多，但每样都好精神，非常新鲜，平时食翡翠螺好似食擦子胶咁样，点知呢次食完全改观晒，原来系咁好味，唔会又韧又腥，呢个海鲜塔令老婆非常满意！食完冻嘅海鲜，最好再饮过热汤消消滞，个龙虾汤真系唔讲得笑，应该系全城最好饮嘅！经理构思，话系完全新鲜即整嘅，同出边唔同，够晒真材实料，一试难忘。食到呢度其实已经有少少饱，最后就想买件牛扒啦，牛扒又系高水准之作，生熟程度啱啱好！喺呢度食饭绝对系觉得环境，服务同埋食物质素都可以攞满分嘅！