Zappy (已結業)

之前上网揾到呢间Zappy Cafe & Bar，环境宁静舒服，场内播放住柔和嘅音乐，绝对适合同男友撑下台脚。我地叫左个黑松露薯条做头盘小食，好大碟，炸得金黄脆口，食落热呼呼的感觉，加上上面铺左不少嘅黑松露，散发住阵阵黑松露香味，非常之好味。主菜方面我哋拣左个蟹肉野菌意大利饭，份量足够，卖相都几靓，有两只酥炸蟹钳放上顶，十分抢眼。拨开蟹钳后，更是有惊喜，有一大埋黑松露酱在面，mix埋意大利饭一齐食...正! 意大利饭唔会太过黏口，一口蟹肉，一口野菌，配合得天衣无缝。蒜香辣油活蚬天使面绝对适合钟意食辣嘅朋友，蒜香味重，而且有辣油铺上面，十分惹味。天使面条条分明，爽口弹牙。蚬肉鲜甜肥美，而且无沙。整体上，环境同食物都唔错，如果想同朋友或者伴侣静静哋倾下计食个饭，呢间餐厅会系个唔错嘅选择。