第一腸粉專賣店 (已結業)

星期日的下午，在不太熟悉的太子下了巴士，鎖定目標要往銀杏館試試，走到半路，雙腳乏力，天旋地轉，心想還要走幾個路口才到銀杏館，心裡有把聲音：捱唔住了，就嚟死啦..... 抬頭一看「第一腸粉」！澱粉質喺呢個時候好吸引，而且都係久聞其名，想試好耐，波蘿仔又同意，二話不說就去啦。想過馬路，波蘿仔眼利見到呢邊街都有一間，梗係店太細，開張勢頭勁時，唔夠使！咁就慳番，食呢邊嗰間！有太多腸粉揀，驚睇完餐牌已經命不久矣，所以即刻叫個蒸飯先。上枱快，比想像細碗，不過好味，唔係靠豉油，而真係有金針同雞汁味。而且鷄係真滑鷄！另外的選擇都幾大路，見有款叫得招牌應該店方好有信心，所以即叫。睇清楚有波蘿仔最鍾意嘅豬潤，咁當然要試試。招牌係豬肉碎同菜圃，咬落去有啲粒粒，也有咸味滲出來。但係豬潤真係驚喜！豬潤爽脆，切得唔厚，食落同腸粉皮互相輝映，好好味！一間食店可以大大聲話比你聽，佢做一樣野做到係店名，係一種信心，亦係一種信念。佢相信鍾意食呢樣野嘅人，會欣賞佢，而唔鍾意食呢樣野嘅人，佢唔會努力遷就你。而如果你要多選擇，佢亦知你唔會揀佢，因為太多茶餐廳可以滿足到你。所以佢未必服務到好多人，不過我估佢有信心食過嘅人會番轉頭