九記牛什粉麵

营业中

休息中

鹅颈桥街巿熟食中心系食晏圣地，清真咖喱、斋菜、碟头饭同车仔面任君选择。谂住两点半过后先上去九记避开人潮，行到楼梯顶推开度门，竟然都见到条 U turn 人龙，急急脚越过廿几人走去龙尾。今日可以叫两碗面，度好晒叫 6 个唔同嘅𩠌，结果系好想食嘅斋同牛膀已沽清，只可以重温老友猪皮、猪大肠、煎鱼饼同鲮鱼球嘅味道。拣唔放汤食捞面，必定要加炸蒜粒同辣椒油，将碗面提香之余，入口更加惹味。蒜粒同辣椒油大放任添，店主非常慷慨。人气最强煎鱼饼好味如昔，香脆兼弹牙；猪大肠洗得干净，零异味；猪皮够入味，唔见有猪毛；鲮鱼球冇煎鱼饼咁香口讨好，怕热气首选。加 7 蚊叫杯热奶茶少奶。茶劲热，够香浓，细味会饮到多种茶香，真心觉得呢 7 蚊系超值。 一路食，条买面人龙长时间都喺度。店员做到冇停手，难得佢哋冇黑面，仲会同生客讲笑，楼面专员动作勤快，一眼关七，佩服之余暗暗给赞。