滕王閣素葷美食

营业中

休息中

如果唔熟北角，大家或者未必知道和富附近有好多隐世小店，另外系和富商场的Foodcourt和富荟都有唔少选择，今次就介绍其中一间米线店滕王阁素荤美食，试下佢系咪达到世一标准。去到店舖发觉呢度其实有好多唔同的选择，甚至米线汤底都有9款选择，包括比较特别的日本面豉、药膳滋补汤同埋沙嗲汤等。咁我寻找世一米线，都系以云南米线方向为依归，所以最终都系拣左鸡翼麻辣米线。一上枱望见个汤底色水唔差，不过就比较稀，都知道未必系正宗的云南小锅米线的做法，不过见到鸡翼煎得几「靓仔」。另外呢度的配菜系任加，种类亦都好多，例如有芫荽、花生粒、葱花、酸菜同埋我钟意的辣菜脯。汤底味道系麻辣米线黎讲唔算浓，似屋企妈妈煲的汤底，肯定系无味精，如果用车仔面汤底黎讲绝对系高质。不过系寻找世一米线黎讲就未必达到标。鸡翼有四只够晒份量，煎得香脆，味道餣得唔错。整体黎讲，连埋饮品都系大约五十几蚊，系港岛黎讲算系抵，仲要晚市与午市同价，如果我住附近都几肯定会变成晚餐食堂。