撈喜 (已結業)

女人系时候要对自己好一啲，天气开始转凉，系时候要对自己补一补，补充下胶原蛋白！所以今日嚟到呢度，食朋友推介嘅花胶捞面！正！ 一去到门口，见到有街坊喺度睇紧有咩食，职员都好用心咁推介。计过散叫同埋点餐，都系呢个较为抵食，所以就决定叫一个豪华啦。虽然餐牌写咗特定既食物，但其实都可以转，只要价钱唔会超出，或者补差价就可以。甘样几好，较为自由，可以自由选择自己钟意食嘅食物，自由配搭。原盅炖汤方面，我都系叫咗花胶炖汤，因为今日主要目的系为左食佢。个汤好浓郁，除咗有大大只花胶之外，仲有鸡肉、猪肉、杞子同埋鸡脚等。炖汤唔错，餐厅有汤券卖，可以考虑买翻啲，几方便！花胶拎出嚟好大只，算厚身，一食就知道好多骨胶原！哈哈！捞面望落去好似好细咁，但系实际上好大碟，一定够食。花胶一样系好大，炆到好林，个汁唔会好咸，捞埋食啱啱好。个面软硬适中，唔会好干身。除咗花胶外，仲有一大只冬菇，入味，好香，有新年嘅感觉。个餐仲包一个小食，我拣咗猪颈肉。猪颈肉好爽口，煎到脆脆地，肥肉唔多，点埋个麻酱食系绝配！好味。钟意呢个餐有个菜，唔会净系食肉咁油腻，食个菜健康啲！菜系烚熟，落少少酱油，无油更健康！无加一。令人回味既一餐！正！