莆田 (已結業)

美食沙漠马鞍山竟然会开咗间米芝莲一星餐厅，点都要试下。餐厅好细，坐落之后同隔离枱都真系手臂贴手臂。不过张枱就都真系好细，摆晒杯碟之后，基本上都摆唔到食物。食物份量全部系袖珍板，你话食份子料理都有人信。喺新加坡食嘅时候，都系细份量，但好似唔系细到咁。上菜速度快，但服务真系完全唔掂！所有人都系好似无受过训练咁，上菜唔够位，竟然可以玩冰壶咁推碟，仲有一次一下横扫我d碗筷，推到我对筷子喺枱边就快跌落地！最出名嘅冰镇苦瓜，唔知系咪苦瓜品种问题，一d苦瓜嘅甘甜味都无，亦切得唔够薄！小食拼盘，我唔食内脏，猪肠无食，豆卜本身得两件，无特别。猪脚冻，食咗一粒，完全无味，大菜糕咁款。紫菜，咪就系平时食鱼蛋粉味d紫菜，完全无分别。香酥鸭，几好，芋头蓉包住鸭肉，鸭嘅油香味唔算丰富，不过正因为咁，无咁腻。外层亦炸得好松脆。卤面，一见到都唔多开胃，相都唔影。碗面就好似糊仔咁，好似煮咗好耐，索晒汤咁。面一夹即断，无牙都食到。虽然奇貎不扬，但已经系全晚最好。整体而言，份量细，价钱唔平，服务奇差！所谓米芝莲，其实真系间间唔同，就算同一集团，都真系唔等于唔会中伏。不过既然用米芝莲一星做招徕，就请用心做好d。