Talk 2 DeCream (已結業)

晚饭过后，总会想揾啲甜品食吓，咁先算为晚餐画上完美句号。呢间雪糕店为处于厚福街再转入去嘅一段小路，在小巷中灯火通明，而且装潢充满少女味道，就吸引咗我哋过嚟。餐牌上嘅图像见到佢嘅雪糕制作都非常精致，而且配搭都特别，所以我哋就每人拣咗一款再share食。朋友系一个朱古力控，所以就点咗金箔朱古力软雪糕。佢嘅软雪糕系dark chocolate味，所以呈现深啡色，面头再洒上一粒粒嘅金箔，简直就系漆黑中嘅萤火虫，而雪糕筒亦用上朱古力窝夫筒，卖相已经非常吸晴。软雪糕充满浓浓嘅朱古力味，由于佢系黑朱古力，食落唔会太甜，不错。而我一向钟情于玫瑰味嘅食品，所以就拣咗呢杯生蜂蜜玫瑰奶杯，听讲系佢嘅招牌雪糕🍦。店员话玫瑰雪糕之所以咁香，系因为用澳洲牛奶同佢哋自家制玫瑰水制作而成，所以每一啖都充满玫瑰嘅清香🌹。而软雪糕内有一层层Oreo碎，所以食到落底都仍有唔同口感同层次。面头淋上纽西兰蜂蜜，再洒上玫瑰花碎，最后仲有一片Oreo同纽西兰纯天然蜂巢，睇得出制作认真而有心思。其实仲有玉桂苹果树我都好想试，不过由于今日人丁单薄，唯有下次再嚟过。