Lagom Kaffe (已結業)

环境装修木系小清新，室内非常空旷，播住音乐加埋人声，十分应声，户外位应该静啲。落单用QR code，有啲难用，唔知点解不停hang机。*嫩煎干贝忌廉黑松露酱汁意粉 $108攞盘满分，干贝面头煎到焦香，入面半生熟，鲜甜味一般，食落唔知系唔系刺身级。酱汁非常creamy，黑松露味道浓郁，配淡淡忌廉奶香，意粉煮到弹牙偏硬，但份量太少啦呱。台式咸猪肉蒜芯蕃茄酱汁意粉 $88攞盘依然十分吸睛，咸猪肉二分肥八分瘦，咸香十足，带少少台南style嘅甜味。海量嘅蕃茄酱汁，酸少甜更多，蕃茄清爽嘅甜配咸猪肉意外地夹。蒜芯甚是辛辣，而且咬落有啲渣，配合唔到意粉嘅质感。鲜奶咖啡 (跟午餐+$17)香味普通，饮落都一般，而且加钱好贵哦。提拉米苏 (跟午餐+$30)朋友极力大推所以我必须要嗌！唉，冇得叫后上已经扣咗分，好彩我食意粉食得快，提拉米苏未热晒。佢有齐提拉米苏嘅元素，手指饼吸满咖啡，香但唔够浓。芝士糊有少许蛋黄香，马斯卡彭芝士味稍弱，酒味微乎其微，几乎为0。芝士糊同手指饼比例系1:1，连埋面头嘅鲜忌廉食都唔会太腻。