十十四川料理 (已結業)

「十十四川料理」系一间位于元朗yoho mall嘅新派川菜馆。餐厅装修走小清新风格，运用咗大量绿色植物同金属吊灯做装饰，大大面嘅落地玻璃窗令到室内光线好充足，餐厅环境阔落，成个感觉都几chill！餐厅主打川菜，款式多样，都有几多意想不到嘅创意料理。🧡招牌酸菜鱼（$168）试过唔少香港嘅酸菜鱼，呢一间个辣做得好出色，连唔系太好酸菜鱼嘅男朋友都一试就爱上！酸菜鱼食落唔会觉得好辣好刺激，反而好香口！鱼本身嘅鲜味都好出，完全无俾个辣盖过！配菜方面就有酸菜、芽菜同薯粉。🧡回锅肉炒面（$78）回锅肉炒面我哋返兜试咗两次，两次嘅水准都一样好。炒面个辣同酸菜鱼一样都系香而不辣，食落好香口好惹味，同埋都好开胃，令人情不自禁会一啖接一啖食，真系辣得好过瘾！🧡十十泡椒芝心猪肉丸子（$78）十十泡椒芝心猪肉丸子呢个配搭都几新潮，味道复杂同有层次，一入口会食到外面一层酸酸甜甜嘅柚子酱，中间系猪肉加泡椒碎，咬开之后系好淡好淡嘅芝士味，最后会有一个回辣嘅尾调。唔会话好惊为天人，但都几过瘾，一试无妨！🧡士多啤梨冰粉（$38）士多啤梨冰粉个味道就唔系话特别好食，但特别解辣！食完辣之后再叹返个冰粉做埋尾，完美！