揀得啱車仔麵 (已結業)

又系赶开会，又系中环，今次去到中远大厦。N年前，呢度隔离新纪元最出名梗系大家乐，执咗九世；其实仲有间快靓正，就系华御结，求其买个饭团咬两啖又饱，点知执埋，成个新纪元啲舖成日转，连1楼间酒楼都冇埋，但原来有间舖屹立不倒，偏偏系消费能力几高嘅地区，最做得住系车仔面。其实呢间嘢开咗冇几耐就试咗一次，不过不失啦，但做到今时今日都仲健在，正常估计都优胜过同区执咗𠮶啲舖头，原来又真系。今次试新嘢食，食佢哋个小窝米线，好多人当麻辣火窝咁食，其实肺炎之后，已好少打边炉，麻辣火窝更加好耐冇食，一于顶下瘾。点咗自选麻辣小窝，𩠌系午餐肉、芝士肠同墨鱼丸。墨鱼丸唔系最cheap食到成口粉𠮶啲，够弹牙，索咗个麻辣味坚正；午餐肉先惊喜，我食𠮶块啱啱煎起，香口到爆，索埋个汁，好似真系食紧麻辣火窝咁。其实都未讲个汁，正常辣度之余，最紧要够麻，麻真系好重要，得个辣字系冇用。整体好回味。如果下次再试，会试豆卜、鸡翼同水𩠌更索味嘅配料。