1988 (已結業)

窗上贴咗可爱风嘅图案, 离远已经吸引住我, 一于上去栋工厦搜寻呢间餐厅。上到去发现原来系一间泰国餐厅, 不过充满少女嘅感觉。🥢杂锦海鲜冬阴功汤河个冬阴功汤底同平时饮嘅冬阴功汤好似, 唔会淡茂茂, 亦都唔会太辣。河粉偏幼, 好烟韧, 有咬口。连我最唔钟意食嘅芽菜都好爽脆, 夹埋一齐食系好味嘅。🥢泰式烧猪颈肉饭猪颈肉烧得好香, 不过略嫌切得比较薄, 食落口无乜质感。配合一个特别嘅泰式酱汁一齐食, 几开胃。🥢虾饼虾饼整到好似虾嘅形状, 大大只, 食落口啖啖肉, 真系会食到虾肉, 上枱仲要系热辣辣, 正!🥢泰国街头雪糕 (椰子味)本来以为无乜特别, 不过一上枱已经比佢吸引住, 无谂过一杯普普通通嘅椰子雪糕, 会放得咁靓, 好似甜品舖咁有特色。味道上有浓浓嘅椰子味, 唔会太甜, 配合埋椰子肉一齐食, 口感层次提升咗。🥢椰汁芒果糯米饭芒果够熟, 所以唔会觉得酸。糯米饭做得比较黏, 椰汁亦偏甜, 所以会有饱滞嘅感觉。整体食物都好食, 不过饮品系用泰式茶底, 饮唔惯就会觉得有d 怪, 餐厅职员都好有礼貌, 服务态度偏好, 系值得再去嘅一间餐厅。