鮨丼 (已結業)

今日同朋友嚟到尖沙咀呢间海鲜丼饭专门店 - 鮨丼。自从喺日本食过爽口弹牙, 又油香四溢嘅左口鱼裙边, 一试爱上。左口鱼裙边成为咗我食鱼生必点嘅一味, 今次当然都唔例外啦。呢度几款海鲜丼都有左口鱼边, 我同朋友齐齐拣咗左口鱼边拼三文鱼丼饭。海鲜丼附有面豉汤、沙律、渍物。左口鱼裙边, 系整条鱼最肥美的部位, 呢度嘅左口鱼肉质虽然非爽口弹牙, 但口感柔软细腻, 油脂甘香丰盈, 入口即溶, 经火灼后鱼油溶化, 完全渗透至每颗饭粒, 鱼油捞饭, 够晒矜贵。厚切三文鱼, 脂肪纹理自然, 肉身顺滑丰腴。值得一提, 平时食海鲜丼一般都附上柠檬, 而呢度则用上青柠, 比一般柠檬嘅酸味, 青柠味道更清新怡人, 唤醒味蕾。甜品椰丝糯米糍, 外层烟烟靭靭, 可惜入面系慕丝, 而唔系我期待嘅雪糕。